呢排身為「梁粉」嘅兄弟姊妹都好頭痕，13萬人上街倒梁喎，除咗收咗250蚊嘅人外，相信都冇乜人敢出聲死撐啩？難得「梁粉」劉夢熊仲有心情拖女行街喎。
齋睇冇幫襯
上星期四8點幾，Dream bear同女伴喺銅鑼灣食完晚飯後，喺附近拖手行街。八方見佢哋行咗幾間電訊公司，都係集中睇智能電話，其間Dream bear仲攞咗自己部電話出嚟用，只見係上世紀產物，係時候換新機，但最後都係齋睇冇幫襯。
之後Dream bear買咗本雜誌，就步行返禮頓山寓所。但去到大堂門口，忽然有個中年男子跳出嚟用手機猛影佢同佢女伴，嚇到佢哋即刻走入大堂。個中年男人一於懶理繼續影，仲好滿意咁睇番條片至離開。