上星期五早上坐車聽到電台新聞話乜嘢「家長幫啲仔女攞表格」，我心想不知又是哪家幼稚園或小學的招生情況。原來搞錯晒，當日係5000白表名額免補地價購買居屋計劃正式接受申請，而排隊嘅不乏家長，之後當然就係畀晒錢送埋個仔上車。由讀書耍樂搵工結婚置業養仔（孫），都一手包辦，無微不至，港產家長堪稱當代父母的典範。晚上睇番新聞片，見訪問其中一位滿頭白髮嬤級女士，她徐徐回答： 「（子女）冇能力買私人樓嘛，所以咪幫佢攞表。」冇能力買私樓，我尚能理解，但連「排隊攞表」都要勞煩個老母，「自顧」能力真沒話說。
港產家長子女 認真唔話得
記起早前友人轉來的電郵，雖不明言是否親身經歷，卻擔保出處。重溫事件，再對照眼下「費青（費事親為的青年）」當道，其來有因。以下為案發經過：
噚日喺九龍分區郵局見到一個中學生，拎住袋嘢企喺我前面，以身高估算應該係高中生，睇住佢走埋去問郵局職員。
中學生：「我想寄呢袋嘢。」
郵局職員：「你包好佢，填咗份form再過嚟。」
中學生（疑惑）：「要包好佢？我袋起咗啦喎。」
郵局職員：「用紙袋裝起，我哋係唔收㗎。」
中學生：「點樣包？」
郵局職員：「你可以用個紙盒pack好佢。」
中學生（緊張）：「要我執紙盒？」
郵局職員：「我哋有得賣紙盒。」
中學生（困擾）：「咁要裝起呢袋嘢要用邊隻紙盒？」
郵局職員：「你試吓呢個啦，X蚊啫。」
中學生：「要𠵱家畀錢㗎？」
郵局職員：「咁你𠵱家買就𠵱家畀囉，你想轉頭買就轉頭畀。」學生不大情願地付款。
郵局職員：「要填張form，你寄去邊？」
中學生：「要寄去香港仔，我要空郵。」
郵局職員：「空郵？」
中學生（認真）：「係呀，最快係空郵嘛？」
郵局職員（稍呆）：「唔好意思，寄去邊度話？」
中學生：「都話香港仔囉。」
郵局職員：「小朋友，寄本港係唔使空郵㗎。」
呢個時候我同排隔籬隊嘅幾個都已忍唔住，嘰咗聲笑咗出嚟。
中學生（受屈）：「仲乜叫我做小朋友啫？我覺得你咁講，係好唔尊重我囉！我都係來寄嘢啫，唔係嚟俾你笑㗎。」
跟住氣沖沖拎埋袋「空郵包裹」走人……
故事講完，如果今時今日嘅「港產」家長同啲仔女，有乜共同點，我會覺得兩者都真係「唔話得」囉。
盧先亞