上月聽人介紹到諾士佛臺幫襯一間新的意菜餐廳Amico，甫坐下見到餐牌設計，發覺跟新地（016）非執董郭炳湘最愛光顧的帝苑Sabatini有九成相似，細問之下，原來三位老闆曾在Sabatini工作多年，招牌菜紅蝦扁意粉正是大郭生最愛之一，價錢卻平一截。
搵舖難過籌錢
「𠵱家多咗人知道食紅蝦，法國紅蝦大隻，賣相好，意大利紅蝦，肉霉啲，但蝦頭非常鮮味……」32歲首次當老闆、負責樓面的Tony說得頭頭是道，似是食家，又似售貨員。
大廚Him比他細三年，同樣是中五畢業不久便投身社會，學西廚，曾在Sabatini工作五年，煮意菜相當拿手，吃那道紅蝦意粉，便食得出師傅用了大量蝦頭去熬醬汁，意粉亦煮得有嚼口。
連同比較內歛的Halt，三位去年突然雄心壯志，決定搞一間意大利餐廳。自己當老闆，最難不是籌錢，而是搵舖。
不想被指抽水
Tony表示，原先想在銅鑼灣開店，但舖租太貴，細舖都要廿萬租，惟有轉到尖沙嘴，機緣巧合下租到諾士佛臺這個樓上舖，4000呎，月租16萬，連同人工及食材等成本，每月做到70萬生意才可收支平衡。新店的關係，剛過去的聖誕及除夕未旺場，開業三周的營業額僅56萬。
Tony明白，因為位置問題，餐廳未必吸引到名人及富豪，即使水準一樣，郭炳湘肯定不會幫襯，幸而口耳相傳下，餐應開業約一個月，已發現不少熟客面孔，部份應該是隱形富豪。眼下目標是希望在一年半內收支平衡，「唔使死住！」
訪問過程中，三人要求不要提Sabatini，怕被指抽水，但三人在這間餐廳相識繼而成為老友、拍檔是事實，有心做又做得好，何懼之有？
李華華
mailto:[email protected]
