John Ho（何達鴻），35歲，港產繪本作家，在內地連奪重要插畫獎項，新近又在屯門市廣場舉行首個個人藝術展。事業有成，最遺憾是患肝癌的母親無法見證其人生重要一刻。四年前，他辭去做了十年的雜誌社工作，留在家照顧母親，陪她走完人生最後一段路。留在家期間，沉鬱的心情、灰暗的現實，幻化成筆下七彩繽紛的世界，創作出受歡迎的「肉肉熊」與「花花貓」。以為前無去路，驟成人生轉捩點，柳暗卻見花明。 記者：呂麗嬋
「我有五兄弟姐妹，排最細。爸爸喺我中學時過世，媽媽係屋企最重要嘅人。自細我同媽媽就特別親近，佢成日講：呢個仔最易湊，只要一張紙、一盒顏色筆，就安安靜靜。由細到大，佢都係我第一個觀眾。
爸爸未過身前，我哋一家七口逼喺間百幾呎公屋，但回憶中嘅童年總係充滿歡笑。未退休前，媽媽喺一間弱智兒童中心煮大鑊飯。我哋兄弟姐妹多，每次開飯寧舍熱鬧，媽咪會記住每個人鍾意食乜，過時過節一家人圍埋包角仔。無爸爸嘅家，因為媽媽仍然好圓滿。
推掉工作照顧癌母
2006年，媽媽證實患上肝癌，我嘅世界不再一樣，醫生話媽媽只剩半年命，我好震驚，唔知點做好。媽媽生命力好強，捱過咗半年大限，身體每下愈況，陪佢覆診嘅次數由兩、三星期一次，到一星期按平安鐘一次。我決定推掉所有工作，留喺屋企照顧佢。
由餵食到清理便溺一手包辦，我又買咗一個『殘酷一叮』放喺佢床邊，唔舒服可以叮我過去。喺媽媽卧病嗰最後半年，我大部份時間都喺屋企畫畫。2007年10月10日，媽媽離開咗我。翌年，我就將喺媽媽病塌旁畫嘅畫輯錄成書，成為我嘅結集《蜂蜜綠茶》，入面記錄咗我同媽媽嘅生活片段。
蜂蜜綠茶，輕輕甜、少少苦。呢本書係獻畀我喺天堂上嘅媽媽。我希望我創作嘅肉肉熊，就算經歷幾多次離離合合，依然無改佢樂觀嘅性格。自從媽媽離開咗，我計劃去唔同地方生活，之前嘅東京、計劃中嘅台灣、首爾同北京。走到那都好，我知道媽媽永遠仍在我心中。」
