李嘉誠辣㷫黃埔花園小業主，搞到呢班中產業主噚日齊齊上街抗爭。黃埔花園有成88座樓、過萬住戶，向來都係九西直選代表兵家必爭之地，所以三名九西立會女將，經民聯嘅鼠王芬、公民黨毛姨姨，以及民主黨一嚿雲，噚日都齊齊現身，全程鬥攝位互「抽」。
三缺一欠「元秋」
由於小業主一早講明，唔想件事牽涉太多政治色彩，所以噚日個遊行，唔見有政黨徽號出現，但只要變通一下，都有出位機會嘅。好似身為當區區議員嘅鼠王芬，就好醒目咁整咗條冇logo嘅大banner撐居民，仲一直行喺隊頭，難怪有主場之利嘅佢咁風騷。
遲到嘅毛姨姨，雖然未起步先落後，但爭勝心好強，加快腳步之後就由佢整嘅banner搶咗原屬鼠王芬嘅頭位，其間仲帶頭叫「李嘉誠回水」口號，呢個位攝得認真靚，唔敢跟嗌嘅鼠王芬當場洩咗道氣。
一嚿雲唔知係咪費事太搶鏡，驚俾人話抽水啦，所以竟然冇預備自製banner爭位，但都有絕招嘅，就係二仔底死跟，全程傍住「死敵」鼠王芬一齊行，唔畀鼠王芬獨領風騷。
嗱嗱嗱，大家有冇發現，呢次遊行三缺一？冇錯，同樣係九西女將嘅民建聯「元秋」蔣麗芸，竟然冇現身，到底係冇獲邀請，定係有鐵票嘅佢唔稀罕呢個票倉？八方唔知呀，但就覺得有埋佢喺度，呢場九西女將互「抽」騷會更有睇頭囉。
mailto:[email protected]