香港電影燈光會同機工協會今年1月1日開始調整酬金，加幅達百分之五十，令唔少電影公司認為加得太瘋狂決定停工抗議，連日來經電影工作者總會同兩會協商後，將加幅降至百分之二十五，由下月15日開始生效，由於事件解決，停拍嘅戲如《冰封俠》同《風暴》等都陸續開工。
加幅資方接受
陳木勝執導、劉青雲同古天樂主演嘅新片《變役》噚日都可以順利喺粉嶺浩園開鏡，投資嘅寰宇公司老闆林小明，噚日同馮仁昭講：「勞資雙方經過溝通後，𠵱家燈光同機工願意將加幅減至百分之二十五，由每組840蚊，加到1,050，呢個係資方可以接受嘅加幅，喺下月15日生效前，所有戲開工都係維持舊價，咁事件可以順利解決，《變役》唔使押後開鏡啦！」
噚日《變》片就喺粉嶺浩園墓地開鏡，場戲係講飾演警察嘅張家輝同吳廷燁因公殉職喺浩園出殯，一身黑色西裝嘅劉青雲同古天樂等分別去拜祭時都忍唔住喊。佢兩個一早開工拍喊戲，埋位前各自培養情緒，青雲一個人四圍行，古仔就冇同人傾偈，好專心投入角色，結果兩人埋位一take過拍完。
撰文：馮仁昭
【齊齊投選2012年娛圈風雲人物】
入面粒粒巨星，你想咀佢，定想掟蕉過去？XD
http://bit.ly/ent_2012 （電腦版）
http://bit.ly/ent_m2012 （手機版）