【蘋果專訪】
【本報訊】唐英年敗選，林大輝反梁；昨天的因，今天的果？「我冇本事為佢（唐）復仇！」說好了的「香港營」「少唐少何」，梁班子管治與市民期望嚴重落差；民怨增、撕裂深，林大輝稱這才是他批梁着力的原因。「梁粉」有價，他卻只願當「諍友」；自古諍友沒有好下場，是禍躲不過，篤信因果報應的林大輝已做好心理準備。
記者：許偉賢
「我離開咗唐英年家族生意好耐，如果我仲係佢家臣，一定要追番好多福利啦。」笑着自嘲的林大輝，言語間不無半點無奈。08年晉身立法會起，他的名字前面永遠有「唐英年家臣」，但凡他的任何舉動，似乎都與舊老闆唐英年有關。他說這個金剛箍，難免令外界對他有誤解，尤其在他對於梁班子各項政策，批梁似乎比泛民更着力的時候。
不滿梁處理僭建手法
「我喺長生津（又稱特惠生果金）、買家印花稅，係第一時間跳出嚟講嘢（批評）；但咁係咪為唐唐復仇？當然唔係。第一，我冇咁嘅本事；第二，我亦冇咁嘅必要；第三，我更加冇咁嘅身份。」就算向梁振英投下不信任票，林大輝也稱只是不滿他處理僭建問題的手法，「絕對唔係站喺復仇角度，挑戰CY」。
雖說與復仇無關，但林大輝較以前更「火辣」，肯定與梁振英做特首有關。「梁振英當選後話要構建香港營，嘩！我當時都陶醉過一陣，覺得唔使再有唐、梁、何營，因為三個營都有好多有才幹嘅人，但原來個成份係『少唐（唐英年）、少何（何俊仁）』，同市民期望有落差，大家其實係想佢吸納唔同界別精英，幫香港度橋」。
梁班子上場後，「出事」官員一個接一個；梁振英說好要搞的基層住屋等問題，至今未解決，不少政策更與民意相悖；怨氣日深、對立加劇，林大輝認定，建制派此時更需要大膽發聲，「就算係建制派，都係要監察政府、令啲政策更加完善。對方唔啱聽，都有責任要講㗎，對方鍾意聽嘅意見，通常都唔係好意見……如果佢嘅政策係好，唔會有人叫到佢下台。」
早料做諍友沒好下場
林大輝強調，他勇於批評梁振英，並非反梁或反政府，梁粉叢中，「我只係想做個諍友」。諍友通常沒有好下場？他笑笑口說，「係，可能係冇好下場，但都唔可以因此而逃避唔做。」
為了證明他並非盲目反梁，他舉了梁振英一個可取之處：「至少我情願同CY接觸，都唔想同煲呔接觸，起碼CY都肯聽意見，誠懇啲，唔似煲呔咁高高在上、擺架子；就算同佢握手，佢都唔會望住你㗎。」