踏入1月份，港股雞犬皆升，短線升市進入最後階段，炒得一日得一日，最好一面揸貨放紙鳶，一面觀察派貨訊號幾時出現。面對閒閒哋1000點嘅大市調整，短線切忌磨爛蓆，有糊要識食。
呢一刻要推介股份，短炒要有把握即抽即獎，基本上見突破阻力急升就撲入，博個市未玩完，可能升多一兩棍，基本因素都唔使睇。
另外，市面上亦有穩陣得嚟剛破位嘅股份，享受升市之餘，調整又唔會輸入肉，揸呢類股可以且戰且走。雖然北京首都機場（694）股價處於2010年以嚟新高，但去年8月高位至今升咗一成唔夠，5.50元係平台支持位，應該好硬淨，中長線前景唔錯，可以唔理港股幾時見頂，Keep住揸。
機場股同航空股一樣，要投入大量固定投資，前者投資機場，後者投資飛機，所以經營槓桿相對高，即係收入增長少少，盈利就增長多多。唔同嘅係，機場股成本結構同油價冇關，最多只係財務成本加啲，航空股就會因燃油價格令成本大幅波動，因此機場股盈利可測性比較高。
中線目標7.8元
首機08年向母公司買入3號航站樓，即時令折舊同財務費用增加，盈利下跌；2010年10月又向母公司配股，集資58億元，大大降低財務成本，之後集中精力控制成本，盈利重拾升軌。
首機舊年上半年純利增長12.7%到5.8億元人民幣，每股盈利13.4分，下半年客運持續增長，同時控制成本得宜，摩通同花旗估今年每股盈利31至32分，即係2012年市盈率約15.6倍，估值唔貴。
隨着內地經濟回穩，客運增長應可加快，舊年上半年收入只升8%，預期稍後能夠擴闊。至於非航空業務收入，包括廣告、餐飲，增長會更快。首機每年盈利增長約兩成，盈利可測性亦高，市盈率去到18至20倍唔過份，合理價介乎7至7.80元，可作為中線目標價。港股短線升浪就嚟燒乾，見頂過後，未來幾個月市況不明朗，首機呢類股份就係攻守兼備嘅佳選。
晉佳
本欄逢周一、三及五刊出