政圈盛傳狼振英做唔長，Plan B之說再起；除咗林鄭大熱，鬍鬚曾繼續係黑馬。就喺呢個時候，鬍鬚曾公佈佢創作咗個天天向上嘅「天天超人」，莫非借此表明心迹？
寓意香港高飛
「天天」漫畫係鬍鬚曾好朋友榮念曾70年代創作嘅漫畫，原來榮念曾舊年以「天天向上」做主題，邀請咗40幾間中、小學學校學生以及唔同界別朋友，一齊喺白色「天天」塑造設計獨一無二嘅「天天」。
鬍鬚曾係獲邀者之一，佢喺網誌話，最初收到近兩呎高嘅「天天」像時都不知所措，好彩有成班同事同佢合力創作。原來有同事原本想為「天天」加一撇鬚、攞住西洋劍，但鬍鬚曾唔想太個人化而拒絕，最終「天天」以「飛天超人」造型亮相，着一件香港T恤，披住粉藍色白雲斗篷，寓意香港高飛。
而呢個「天天超人」着嘅並唔係現成T恤，而係以棉線編織而成，代表公務員樸素有條理咁話，「天天」手上用以點綴嘅手繩，則由「文房四寶」之一「盲公繩」織成。