鬼馬歌后仙杜拉當年憑《啼笑姻緣》一曲成名，她的人生哲理跟歌名一樣，一字記之曰笑，曾患乳癌要切除左乳房保命的她，從沒想過要停下唱歌腳步歇息，她覺得上天給她任務，就是以歌聲帶給人歡笑，別人就算忘記她叫仙杜拉，但見到她就會叫：阿笑！
撰文：余燕儀
憑《啼笑姻緣》掀起廣東歌兼電視劇主題曲熱潮的仙杜拉，早期與阿美娜合組筷子姊妹花，專唱英文歌，估不到一個滿口ABC的「鬼婆」，竟然唱廣東歌一曲成名，她說：「真係好多謝煇哥（顧嘉煇）同霑叔（黃霑），佢哋仲畀我唱好多廣告歌，好似兩個夠晒數、V老篤眼藥水，霑叔教我咬字，佢心地好好，嗰時我將《鳳閣恩仇未了情》整咗個國際版，因為粵曲好難唱，打電話問佢，兩個月後佢就走咗，我珍惜到而家，好多謝佢。」
拒絕應酬埋堆
於01年患乳癌的仙杜拉，那時當機立斷切除左乳房保命，經歷過生死一線的仙杜拉，並沒有停下腳步休息，依然熱愛唱歌，她說：「除非我唱唔到，天主叫我休息，我就會聽話，唔唱歌我會唔開心，一停就會病，我覺得上天畀我咁好恩寵，天主畀我咁好任務，係帶畀人歡笑，我點解要收埋呢？使命我係有，我又做得到，所以我覺得好幸福，喺街啲人唔記得我叫乜名，會叫我做阿笑，之後就醒起我叫仙杜拉，哈哈哈！唔緊要，都係一個稱呼啫，最緊要唔好唔記得笑。」
入行多年，仙杜拉甜酸苦辣都嚐過，不開心的事她不會記住，她說：「或者我係比較唔理嘢嘅人，可以話入錯行，因為我唔鍾意應酬、埋堆、擦鞋，覺得好浪費時間，我係賣唱，唔係賣第二樣嘢。」難道在娛樂圈生存真的要犧牲色相？她說：「冇，即係咁樣，啲人問我點解唔埋堆？我覺得人各有志，開心自己找，煩惱自己尋。」
仙杜拉沒後悔入行，她覺得既然天父賜與一把靚聲，觀眾又接受她，每次站上台唱歌，她都好興奮，早前她返港為顧嘉煇演唱會做嘉賓，還被製作人丘亞葵成功游說，將於今年在文化中心開處女騷，她說：「我未喺香港開過個人演唱會，之前好多人搵我做，但自己好揀擇，我覺得唱咗幾十年，一定要好先做，唔好就唔做，𠵱家心情好興奮，一啲都唔緊張。」
做人只向前看
年齡是女人的秘密，仙杜拉不肯透露年齡，連維基都沒資料，出道數十年的她，依然將頭髮染成金色，眼鏡戴紅色，她說：「我一直好前衞，只諗明日唔諗昨日，又唔記仇，因為記仇好笨，做人最緊要向前看同珍惜每秒每分，人哋話今日唔知明日事，我話假嘅，一陣唔知一陣事。」雖然年紀唔細，難得她身形保持得很好，仙杜拉鬼馬說：「唔係keep，我瘦好易，激一激就瘦，我住嗰度上層花槽漏水，應該兩個禮拜乜都整晒，點知整咗四個半月，嬲到成個人瘦八磅，𠵱家整番好，可以增肥。」
移民加拿大18年的她，很享受當地的休閒生活，空氣又好，故沒想過回流香港，她說：「嗰度地方大，一日好快過，出街開車已經冇咗一日。」不過，早前返港做騷重遇張學友、陳奕迅、黃耀明，令她好開心：「佢哋好好，好親切，喺觀眾席又見到馮寶寶，當年佢拍《風雲》，我唱主題曲，咁啱我唱到一半握手見到佢，佢又唱番幾句，真係夾都夾唔到。」