殘股近期成為市場焦點，在資金輪流炒下，尋寶遊戲肯定未玩完。軟件產品及服務供應商金蝶國際（268）去年大跌三成，跑輸大市一條街，呢排股價有突破之勢，玩醜股大翻身要預埋佢。
截至去年6月底，金蝶轉蝕2.1億銀（人民幣．下同），毛利率回落8個百分點至68.6%。為扭轉弱勢，金蝶講明會強化雲管理產品研發及推廣，致力成為全球龍頭；市場預期，內地十二五期間，雲計算產業規模超越1萬億元，2014年雲儲存戶更會突破4億，反映金蝶有力從谷底反彈，上升空間肯定大過下跌空間。基金亦睇中呢個亮點，近期摩通、鄧普頓及Capital Group積極在市場掃貨，持貨量達6%至8%，擺明要食大茶飯。
金蝶上周五收1.56港元（下同），逆市升4.7%，更一度升穿250日線（1.57元），熊轉牛迹象明顯，日線圖成功升穿降軌，成交亦配合，現價買入，首站睇兩蚊絕不過份，屆時仍較去年高位低兩成。
唐牛