御泰中彩（555）buy兩個字：「超平！」祖國彩票股有呢期勁爆嘅中民控股（681），半年大升76%，華彩（8161）36%，御泰升得16%，價殘超平。御泰2012年度中期，純利大升四成，到4.4億銀，係華彩嘅9倍，而中民嘅彩票業，仲係見紅，冇嘢睇。再講，御泰有齊上下游業務，又兼營晒體育及褔利彩票兩個瓣數，講純利晒士，業務優勢，好有一哥味道。又上年祖國11個月累計彩票銷售，高達2347億元人仔，增加近18%，繼續好景，好保守計數，御泰全年度純利起個孖到8.8億銀，2012年度PE得5.9倍，而華彩預期PE 10倍，至於中民，繼續冇嘢睇。講PE，御泰又係超平！御泰翻半番到0.96元，PE仲未追到華彩，升幅亦未及中民同期升幅。
明豐落後可短打
珠寶股炒到澎澎聲，明豐珠寶（860）啱啱星期五先嚟郁，有得諗吓。明豐一年前嘅PB高達一倍，家陣喺三年低位，PB得番0.6倍，拍得住景褔（280），PB之吸引，明豐都數一數二。又明豐主打內地奢侈品市場，呢期奢侈品消費類耀萊（970）彈上，明豐升勢亦落後。短打博明豐升20%到0.46元，未有耐上到NAV 0.64元。
錢雋