球壇怒漢祖爾巴頓，又有驚世言論發表，佢話要烚熟人！原來上月底佢女朋友父母屋企俾人打劫，雖然兩老咁啱唔喺屋企，逃過一劫，但唔少珠寶同現金就被賊人偷咗。祖爾巴頓知道未來外父俾人爆格，當然嬲到飛起，佢話賊人喺屋內留低咗血跡，相信好快就會被捕，希望法庭可以判佢哋坐監。講到呢度都正正常常，但佢最後突然話：「如果俾我判，我實監生烚熟班賊！」