體育開講:祖與仙 - 馬啟仁

體育開講:祖與仙 - 馬啟仁

不嬲喜愛文仙尼,踢波時的佢固然有型,教波後的大褸加長髮亦係「阿佬一族」的清泉,摩連奴未回歸英超之前佢至搶鏡嘞,然後再目睹中佬竟然同花靚仔巴洛迪利開片,唔係吓嘛,呢啲不單止係活力,更係勇悍,明知輸硬都郁手,不可為而為之,真Man也。
其實球場內外衝撞講手真係普通過乜,fb瘋傳嘅幾張相,加幾句爆笑嘅解畫,完全係八卦雜誌小題大做的手法,笑完當真事話畀人知的話絕對係你笨蛋。最令人撃節讚賞嘅係文仙尼之後嘅訪談:「根本冇乜大不了,你班友仔將件事放大咗啫,如果要我畀個評價巴洛迪利的話,我會話我會再原諒佢100次!」乜嘢叫做胸襟,文仙尼真人表演咗一次。

算吧啦!巴神根本唔係一般人,你放大佢一個藐視嘅眼神,一下反守為攻嘅打人動作,又如何?男人嘅世界根本上充斥住唔少好似佢咁嘅鬼靈精。個個扮大佬扮認真,一個「大細路」係好重要嘅,一來有得笑,二來佢亦滿足咗好多大阿哥照顧細佬嘅慾望。
我中學時代嘅一位同學仔,就係咁嘅一位開心果,明明牛高馬大,偏偏細我成兩三年,人人好嚴肅嘅時候,佢就會搞笑;人人爭住認叻時,例如做甚麼學會搞手時,佢咩都唔玩,人人響體育堂着靚波鞋,佢就竟然着皮鞋踢波,但偏偏佢又會入到波又扭到你暈。總之佢做嘅一切,就係同世俗反其道而行,我哋表面成日話佢,其實心底都好愛呢位細路,因為佢將大家心底裏嘅童真繼續保存住,你有見過南華時代嘅百厭星山度士嗎?一模一樣!係山度士矮少少啫。

祖高爾回歸母會韋斯咸,會唔會回勇就唔知,但係肯定佢會開心番好多,皆因呢位自細就被視為神童嘅「𡃁仔」,終於可以遇番好多睇住佢長大嘅叔伯兄弟,身份由多年來響車仔同利記扮開嘅好波之大人,變番做貪玩的細路,可以好好享受響麻甩佬之間嘅趣味。
文帥同巴神玩打架算乜吖,當年溫布頓就最鍾意玩燒波衫啦,我嗰位同學仔,就最興玩偷桃,不過每次最後都係佢笑住被人圍插!
keyman
now TV主持
mailto:[email protected]