【勁膠金曲頒獎禮】時下歌手咁恨攞獎，冇獎郁吓就玩杯葛，可惜豬肉頒獎禮僅得一家，咁少獎點夠歌手分？有見及此，本報娛樂版舉辦另類樂壇頒獎禮──2012年度勁膠金曲頒獎禮，旨在表揚過去一年為本港樂壇耗盡心血、炮製出膠味濃烈歌曲的歌手。讀者可登入投票專頁 http://campaign.appledaily.com/2012awards，投票選出膠曲膠獎、最膠男／女歌手及最膠唱片封套，結果將於本月20日在本報娛樂版揭曉。
撰文：蘇芬妮
十首膠曲
《真心英雄》梁振英
CY在大球場「開騷」，帶領金牌運動員唱《真心英雄》，可惜冇粒音準，仲要甩beat慢三拍，變相如同唱和音，好聽程度，可與周一嶽睇齊。
《GIMME FIVE》亞視群星
亞視55周年台慶歌照dup尹光首《Mr.One》，歌詞九唔搭八，總動員揮手嘶叫「跟住一齊收（shout）亞洲亞洲」，又點少得亢帥克份。
《中情局》路芙
新城DJ路芙主持節目《恐怖熱線》都唔及唱歌曲《中情局》恐怖，旋律極度陰沉，其五音不全的歌聲迴蕩共振，令聽眾猶如置身靈堂及徘徊鬼門關一樣，叫它絕世煩音也不為過。
《小明上廣州》（普通話版）李家仁
李家仁《小明上廣州》普通話版，歌詞勁蹺口，「打膠（高）鐵，𧄌油油（樂悠悠）」似爆粗，rap到最尾索性夾埋廣東話，勁有張如城feel。
《傷人舞》陳蕊蕊
「柑桔」蕊蕊轉型，賣樣唔賣歌就梗㗎啦，副歌夾硬插韓文「沙冷hea」，彷彿韓文只得呢句。MV更攞命，蕊蕊大跳機械胸舞，美感為零。
《Bye Bye Love》梁佑嘉
梁佑嘉繼「真不解、真不解」後又一傑作，《Bye Bye Love》歌詞重複又重複，「886（Bye Bye Love），888886」如唱機跳線般不停loop。
《姐姐》李克勤
照歌詞理解，首歌應該係歌頌菲傭，但副歌離奇變情歌，以為譜出中菲戀㖭！歌詞似求其啱音就填落去，「路過砵甸乍街竟找到你」即係點？
《怪叔叔跳古怪舞》莊冬昕
前年一首《食軟雪糕》莊冬昕被罵到狗血淋頭，上年整多首《怪叔叔》，擺明同網民過唔去。美其名係惡搞，實則掩飾自己技窮，失敗。
《戀愛大過天》劉美君
莫說48歲的劉美君，就算叫Twins翻唱都覺得「銀」耳，劉美君唱的jazz版確實另類，大家要聽務必skip了「現在我未成年讓我膚淺」這句。
《難忘時刻》環球群星
成首歌幫中共歌功頌德，同洗腦式國民教育毫無分別。MV仲離譜，畫面報喜不報憂，七一遊行、六四集會統統冇影，不如叫《忘記時刻》。
最膠男歌手
梁振英
一曲難忘，唱歌同講大話都唔眨眼。
莊冬昕
曲高和寡，誰人明瞭我心聲？
阮民安
因炒賣黃牛飛而見報，能人所不能。
李家仁
當他是歌手，獲提名應該都很高興。
陳偉霆
陳偉霆獲提名應該有更多人認識。
最膠女歌手
路 芙
新城安排DJ出碟圓夢，卻是聽眾噩夢。
梁佑嘉
劏房大王梁平女兒，銀彈用不盡。
龍小菌
一年四季蒙住面，凝住有陣膠味。
陳蕊蕊
跳舞誇啦啦，一開口算吧啦。
許 穎
𡃁模Phoebe新城頒獎禮分豬肉都冇獎。
最膠唱片封套
楊千嬅《金牌10年精選系列》
雖說是精選碟封面，但舊公司金牌未免太求其吧，草草幾筆素描，半身千嬅驟眼看以為穿三點式！
龍小菌《誰可聽我唱歌》
120大元的唱碟，包裝如同老翻，黑漆漆加張龍小菌相算數，毫無設計可言。
亢帥克《SHARCO KANG》
看到這張封面有何感覺？我係1號亢帥克，請投亞洲之子一票吧！冇錯，就係選舉廣告！
區文詩《ANGELA AU》
餅碎Angela長髮遮胸，被港鐵禁止賣廣告，惟有改用白banner蔽體，搞到不倫不類。
Mr.《misterdays》
被篤爆涉抄襲日本樂隊東京事變細碟封面，依然面不改容，講到尾坐時光機係冇罪嘅。
