美國國會通過加稅方案，將部份小布殊嘅減稅政策變成長期化（共和黨阿Q式自稱爭取到勝利），換取向富人（個人年收入超過四十萬美元）加稅（約2%美國納稅人受影響），呢一點係奧巴馬嘅勝利，可以向支持佢連任嘅選民交代。但奧巴馬及民主黨最大嘅勝利係阻止共和黨嘅削減開支要求，兼且工資稅（payroll tax）恢復舊觀，小布殊減到4.2%，依家回復至6.2%，因為咁，所有美國打工仔都要交多啲稅，約77.1%美國家庭會交多啲稅，故此美國削赤只得開源（加稅）一瓣，並無節流（減支出）。呢次加稅，十年內可以增加稅收六千四百億美元喎。
開源而不節流，如何縮減四萬億元財政赤字？天曉得，好彩美國可以印銀紙，既然國家債務上限十六萬四千億美元已經觸碰到，美國必須在二月二十八日或之前通過法案，提高借貸上限，否則美國國庫債務就會違約，奧巴馬好得戚咁講定先：「債限僵局不能重演。」言下之意，就係叫共和黨議員不可利用「提高債務上限」作為「談判籌碼」，逼奧巴馬削減公共開支。
獅子王心水清，搵番一段2006年一位當紅參議員嘅說話，傳俾左丁山睇：「今天我們要辯論美國債務上限，是華盛頓沒有領導才幹的象徵；我們今天下一個壞決定，把重擔轉移到我們的兒孫兩代，美國現有兩大問題，就是債務與領導無能。美國人應該得到更好！」呢位參議員就係奧巴馬，當日批評小布殊總統，呢番言辭完全可以用番嚟批評奧巴馬總統！2006嘅美國國債有三萬五千億美元，奧巴馬在2009年一月上任後，國債連年上升，現在連上限十六萬四千億美元都唔夠用，你話幾笑話。做政治人物，面皮一定要夠厚，就算以今日之我打倒昨日之我，仍然面不紅，耳不熱，好堅定咁講：「記憶中，我冇講過冇債務上限問題。」或諸如此類，面皮薄如唐英年呢類老實人，最好都係去旅行嘆紅酒，唔好俾政治玩親。美國政治好似唔關香港事，但因為我地有條臍帶與美國連在一起，聯繫滙率是也，將美國經濟病毒吸收過嚟，美國之事，就與我地息息相關，美國政府借債太多而出現問題，香港實會當災。