【灣仔】李嘉欣婚後專心湊囝囝許建彤（Jayden Max），閒時都係拍吓廣告同出席吓活動，對上套電影記憶中都係客串過陳可辛（Peter）監製嘅《十月圍城》，同緋聞舊男朋友黎明合作。不過由此可以知道嘉欣同Peter幾好朋友，客串都肯演出。
前晚7點鐘左右，喺灣仔星街一間西餐廳見到Peter、吳君如同李嘉欣三個人喺度聚舊，兩家人難得可以掉低小朋友見面所以見佢哋都傾得好投契。佢哋三個人開咗支紅酒坐喺餐廳嘅角落位，嘉欣仲要搵個柱位遮住自己，非常保密。食咗差不多一個鐘，眼利嘅君如發現有記者影相，佢即刻通知在座各人，然後自己就移入柱位遮住自己。
坐多10多分鐘左右，見佢哋嘢都未食晒就匆匆埋單走人，君如一馬當先行出嚟，Peter跟喺後邊，而戴住墨鏡一身運動衣潮look嘅嘉欣就殿後行出嚟。君如上番自己架七人車，嘉欣就坐番佢嘅私家車離開。見佢哋傾得咁神秘，唔知Peter係咪想游說嘉欣復出拍戲呢。
採訪、攝影：馬建華、朱志聰、徐錦池
【齊齊投選2012年娛圈風雲人物】
入面粒粒巨星，你想咀佢，定想掟蕉過去？XD
http://bit.ly/ent_2012 （電腦版）
http://bit.ly/ent_m2012 （手機版）
