律政司司長袁國強上月趁外傭爭取居港權案上訴之際，突然建議終審法院提請全國人大常委會釋法，企圖同時禁止雙非嬰兒擁有居港權。各界狂轟政府摧毀法治，「港媽」嚴潔心曾反國教和遊行倒梁，政府建議人大釋法解決居港權問題，她大力反對，擔憂港府今借雙非隨意干預法治，港人日後便要付出失去自由的沉重代價。
記：《蘋果》記者 嚴：嚴潔心
離島媽媽撐一國兩制 「留港因為有自由」
雙非湧港激發大批港媽上街遊行，抗議產科床位及學位不足。
記：你或你的子女有否受雙非問題影響？
嚴：我個女兩年幾前喺瑪麗醫院出世，當時病房冇話俾內地孕婦逼爆，加上我哋本身住離島，個女讀番島上嘅幼稚園，都冇話要同人爭學位，但其他市民都有講雙非令本地媽媽產檢排長龍，畀得起錢去私院都好難預約到床位，學校學額、尤其北區又唔足夠，呢啲問題都深化咗人與人之間嘅矛盾，令個社會好分化。本地媽咪要同雙非媽咪抗衡，雙非嬰兒又變成被針對對象，但其實佢哋根本冇權揀自己喺邊度出世。
記：你對釋法立場是甚麼？得知政府建議釋法有何反應？
嚴：當然覺得好憂慮，唔想見到政府每遇到施政困難就用提請人大釋法去解決。作為相信法治嘅人，我仍然希望政府尊重普通法嘅制度，香港能夠堅守一國兩制。
記：但基本法委員會副主任梁愛詩，以及全國人大常委范徐麗泰均公開支持釋法，認為有關做法是解決雙非問題最快捷方法，你為何仍反對釋法？
嚴：對政府嚟講，釋法係解決雙非最容易嘅方法，但床位、學位或奶粉唔夠，係因為政府缺乏長遠嘅規劃，係施政上嘅失誤，香港社會除咗雙非外，政府仲會有幾多嘢尋求人大釋法呢？今日一跳就跳咗去用釋法解決雙非，但香港人要犧牲嘅係冇咗法治，咁又係咪值得？
記：若不接受釋法，你認為還有其他方法解決雙非問題嗎？
嚴：我覺得社會上有人嘗試做到個論述，係奶粉同床位問題唯一嘅解決方法就係釋法，但我都係一個喺本地公立醫院生仔嘅媽咪，我自己冇遇過好大嘅奶粉或床位問題，呢啲問題某程度上係地區性，某啲區份係需要多啲醫療硬件嘅配套或醫護人手，學位係咪足夠同樣要長遠規劃，政府喺呢啲問題上根本缺乏一個具前瞻性嘅策略。
律政司被指向終院施壓，因若終院提請釋法，會令人覺得法院「曲解法例去迎合政治要求」；若不提呈，則令人感到法院與中央對立。
記：律政司是否不擇手段？
嚴：據我了解，律政司係有權提出咁嘅建議，佢冇跳過終審法院，佢仍然喺香港嘅司法制度內進行，我對終審法院嘅法官都有信心，相信做得呢個位嘅人都撐得住，會按法律去做判斷，而唔係聽某一、兩個位置上嘅人講嘢。
記：若以釋法解決居港權問題，香港將來失去的會是甚麼？
嚴：大家問心，有咩令你仲想留喺香港生活？其實就係嗰份自由，你仲可以對唔公平嘅事出聲，去批判政府，政府仍然某程度上受到監察。
同國內比，我哋仍然有新聞自由、司法獨立，呢啲好明顯係我哋覺得好重要嘅嘢，係長遠我哋要珍惜嘅嘢，奶粉、床位、學位呢啲，如果政府係有能力，根本就有釋法以外嘅方法解決，而唔係需要放棄我哋喺司法獨立。
記者：陳沛冰 陳凱迎
攝影：黃偉傑 王子俊
mailto:[email protected]