【電視風雲之再開殺戒】亞視近日強制合約藝人上洗腦班，無故曠課的藝人會被炒，上月冬至先向戚黛黛、張啟樂、陳綺雯和張紫櫻（車車）開刀，昨日第二波怒炒蒲進。星光幫成員李志豪昨爆料指遭亞視掟入雪櫃，亞視高層葉家寶指會給李志豪考慮限期到後日，第三波隨時榜上有名。
亞視對拒絕接受洗腦課程的藝人格殺勿論，繼上月炒戚黛黛、張啟樂、陳綺雯和車車後，近日一直傳缺課的黃宗澤舊愛甄詠珊、無綫藝訓班出身的林峯師兄蒲進、亞姐馮雪冰和王家敏都可能被炒。
亞視在聖誕長假後復課，還安排記者做老臨出現課堂直擊，蒲進和馮雪冰堅持繼續曠課，王家敏因出現過亞視執行董事盛品儒的飯局，加上她日前已蒲頭，所以昨日第二波炒魷得以倖免，昨日蒲進被通知返大埔亞視總台執包袱，戚黛黛、張啟樂、陳綺雯和張紫櫻則返回亞視攞支票。一直缺課的星光幫成員李志豪，近日手頭工作無故被叫停，相信他都危危乎。
李志豪入雪櫃
記者昨日致電蒲進查問是他主動離職還是被解僱？他在電話中說：「係後者，我可以講呢刻我係自由身，唔想太多意見發表，𠵱家需要時間沉澱一吓，暫時冇乜嘢想評論。」張啟樂昨日還在微博貼了跟蒲進的合照，更抵死留言：「兄弟，歡迎你加入我們的失業大軍！我們要繼續努力，希望有機會可以在同一個舞台一起演出！」
戚黛黛等四名首批被炒藝人爆料未收到亞視支票後，昨日終如願取回應得報酬，她在電話中說：「唔係好多錢，但我哋嗰日上完nowTV訪問後，即接到亞視通知有支票拎。」問到可有約同其他三名已取支票的失業藝人慶祝，她說：「𠵱家失業要儲起啲錢，仲要積極搵嘢做。」
據知洗腦班開課至今從未參與的李志豪，近日工作全被抽起，他昨日在電話呼冤：「我近排接咗陳木勝部戲演配角，本來公司手頭有三個節目，但亞視冇知會就推咗我部戲，又掟我入雪櫃。我份約係唔使上課程，事前都同藝員科討論過冇時間上，但佢哋通知要我轉合約形式，要取消我嘅底薪，好唔合理。」李志豪早打定輸數將面臨被炒。
亞視高級副總裁葉家寶昨在電話中說：「今日只係炒咗蒲進，一早畀咗時間佢考慮，好和平咁解決，佢都接受公司決定，證明公司一視同仁。」對於李志豪的去留，葉家寶指亞視容許他考慮到後日：「公司唔希望再有藝人被裁，勸喻大家紀律。」又解釋甄詠珊和馮雪冰請長假。
黑絲儀走得快
此外，江美儀昨日到新城電台接受訪問，講到藝員沒有上堂會被炒魷，不跳舞又炒時說：「好彩我走得快，唔係我炒梗，我一定唔會跳嗰隻舞，我跳舞留番黑絲等上位。」
採訪：比華利、王連連
攝影：陳辰、徐錦池
【齊齊投選2012年娛圈風雲人物】
入面粒粒巨星，你想咀佢，定想掟蕉過去？XD
http://bit.ly/ent_2012 （電腦版）
http://bit.ly/ent_m2012 （手機版）