與生俱來的掌紋，是否可以影響一生命運？堪輿家麥玲玲表示掌紋顯示性格，男左女右。有名牌首飾品牌找來章子怡、甄子丹夫婦和英國歌手史汀（Sting）等紅星拍宣傳照，同時卻出賣了他們手心的秘密，麥玲玲替他們逐一睇掌，信不信由你！撰文：比華利
甄子丹
麥玲玲：「拇指對落嘅金星丘脹卜卜，肉色又靚，顯示佢精力好，身體健康，男人如果呢個位太大會係色狼，但子丹就大小適中。睇番佢嘅感情線生得唔錯，弧度生得靚，一旦太直代表嗰個人現實，但睇佢弧度夠，代表佢肯為另一半付出。子丹嘅頭腦線略為下墜，顯示佢份人有少少感情用事，有時感情會戰勝理智。子丹眼下嘅子女宮生得飽滿，代表佢子女都齊備，就算再追多個都仲得。」
汪詩詩
麥玲玲：「詩詩嘅感情線好彎，代表佢為人好容易感情用事，呢類型嘅人容易俾人呃。生命線有碎紋，即係身體易有濕碎小毛病，尤其要注意關節問題，腸胃上都弱少少，要重視健康。詩詩五指比較尖長，呢類型嘅人好有藝術天份，有獨特嘅審美觀，對顏色配對有另類眼光。」