終審法院2001年於「莊豐源案」裁定雙非嬰兒擁有居港權後，吸引大批雙非孕婦壓境，產房爆棚，學額不足，造成本地父母與雙非爸媽對立。育有六名子女的港媽Mandy支持全國人大常委會釋法，她說飽受雙非壓迫，爭奶粉、尿片及學位。若要在下一代實際生活需要，與法治二選一，她必維護子女應有權益。
記：《蘋果》記者 M：Mandy
統計處資料顯示，由2001年「莊豐源案」後至今，共19.5萬名雙非嬰在港出生。
記：雙非問題如何影響你及子女？
M：我有六個仔女，分別14、12、10、6、兩歲同三個半月大，兩歲個仔今年讀幼稚園讀K1，因為好多雙非（嬰兒）爭學位，上年要提早幾個月報名，我心理壓力好大。
喺屯門醫院生孻女時病房逼爆，𠵱家去健康院打針又要等，比以前等多一倍時間，又嘈又逼。我參加過兩次反內地孕婦遊行，話畀政府聽我哋受壓迫。
記：你對釋法立場是甚麼？當你知道政府建議釋法時有何反應？
M：如果呢個係唯一徹底解決嘅辦法，我會支持。聽到呢個消息第一個反應係開心，以前政府一直話諗辦法，都係只聞樓梯響，今次覺得政府真係做嘢。
法律界人士憂慮釋法會摧毀本港司法獨立，終審法院非常任法官包致金更對香港法治前景表示憂慮。
記：你是否認為釋法會破壞法治？如果是，為何仍支持釋法？
M：冇破壞就假嘅，因為法官已經判咗「莊豐源案」，𠵱家重新解釋（釋法）即係推翻判案。但學者、議員唔理解我哋小市民嘅苦況，佢哋搵到錢，可以送仔女去國際學校或者去外國讀書；我哋要同雙非競爭，學生、家長同教師壓力都好大。
我唔係唔支持法治，只係大家價值觀唔同，衡量嘅嘢唔同。佢哋着重法治精神，我哋要維護下一代嘅需要，冇奶粉佢哋食乜？唔用尿片用乜？我哋連眼前基本生活需要都搞唔掂。雙非問題擾攘咁多年，我哋下一代要養埋雙非，甚至佢哋申請落嚟嘅父母，個個都捱緊。民主法治同民生，我揀民生先。
去年有1,013宗內地孕婦衝急症室個案，較前年全年的1,656宗減少；今年公私營醫院不收雙非。議員、學者認為加強行政措施可阻截雙非，毋須犧牲法治。
記：你認為行政措施是否有效？
M：行政措施唔可行，雙非同中介公司好蠱惑，一定搵到漏洞。雙非係一個都嫌多，一定要唔畀居港權佢哋，先可以徹底解決問題。你哋話唔釋法，咁有冇更好建議？如果冇，唔該收口。
港大法律學院助理教授張達明指，今次釋法開了壞先例，日後人大常委會可隨意按內地法律原則，解釋《基本法》中各項保障港人權利及自由的條文，收窄本港自治。
記：會否擔心今次釋法打破缺口，日後本港的人權及自由會收窄，影響下一代更甚？
M：將來嘅影響難以估計，議員、學者應該有辦法繼續守住法治。之前釋法兩次，大家都係咁樣生活。如果當初判錯（「莊豐源案」）就要糾正，而唔係強行保持法治尊嚴，而令大眾受影響。
記者：陳沛冰 陳凱迎
攝影：黃偉傑 王子俊