昔日爆冷溫床嘅英足盃，已變成英超強隊搶錢搶盃搶歐洲賽席位嘅勝地；無謂刻意求冷，今晚捧上半季喺英超排名上半版嘅西布朗同史篤城，借呢個盃恰「低級」球隊發圍。
英超快車喺天氣同場地尚算正常下，密密打都難見迭爆場面，緊接嘅英足盃，波友無謂搵放大鏡吼邊支低組別發到圍。英超隊現今運作成熟，錢聚腳夠叠馬，好少黑到似紐卡素成籮傷兵兼最猛射手話走就走損軍心；今晚紐記遠征南下早場作客白禮頓，你以為低組別嗰隊好分啲，莊家真的不笨開出平手盤，博冷變妄想；反計值博率，殘紐屢遇強敵輸波不足辱，睇頭場直播當可「冷敲」。
揸莊好似播波嘅now咁，美職聯、意甲、英聯盃同英冠今屆閂水喉唔播；令我哋呢類為公為私、波癮大嘅球迷月費照畀，但選擇少了好多，評論英足盃嘅低下級球隊無奈紙上談兵。足智彩更辣，免賭盤屆時因出場陣容大變操盤手頭痕，直至昨晚執筆時為止，今輪32場開盤嘅英足盃，甚受普羅球迷歡迎嘅讓球盤只開得3場，「先發事件」都唔敢開，乜唔係搭通英國各球會同海外大莊天地線，得到第一手軍情？非法外圍莊家仍見猖獗，縮窒縮窒嘅足智彩其實有時係間接幫兇！
牢騷多了，前文提過大堆頭嘅英足盃已少見冷門開出，睇番上季第3圈，唔計英超隊互撼，實得韋根一隊喺呢輪作客敗走甲組嘅史雲頓，一出即死；打和要重賽嘅英超隊得3隊，既然莊家唔敢開讓球盤，小弟首選有2.2倍客W嘅史篤城打低喺英冠爭緊升班嘅水晶宮。後者由荷路威從黑池過檔掌帥，喺聯賽勢頭更勁常佔三甲，相信荷帥會一如前帥喺今屆聯賽盃次圈已出局一樣，盡快棄「足」為爭升打拼至上。相反史篤城呢支硬漢兵團漸入佳境企番英超前10，高不成低不就最合盃賽發圍見步行步，一班高佬作客到水晶宮打簡單足球更合，對手由上仗送贈3蛋嘅曼城換上英冠隊，單W仍有分頭可反底。
另一英超客W取西布朗作客贏昆士柏流浪，後者劇戰整個快車期，無厘頭贏車仔，一班主力尤其後衞博得好盡，哈利列納以護級為重必定大輪換。
西布朗上次聯賽迎戰富咸有睇過直播嘅球迷，都記得輸得唔抵，主帥奇勒聯賽玩開輪換打16、17個精兵，拆禮物日同地交手贏過「包尾昆」2:1，添食不奇。
(下次見報日期：12/01)