AC米蘭周四作客友賽意大利丁級聯賽球會Pro Patria,開賽冇幾耐,「王子」奇雲保定已被主場球迷用種族歧視言語侮辱,之後仲變本加厲,呢位射手踢到26分鐘忍無可忍,將個波踢向觀眾席後,同隊友罷踢離場,友賽亦被迫腰斬。A米教練艾基利對球迷嘅行為感到失望,「呢種不文明行為必須要停止,球員係喺別無選擇之下而離場,今次帶出一個重要信息,足球場上絕唔容忍任何種族歧視。」意大利足總已就事件展開調查。