中國古有劉備躍馬過檀溪故事，今日美國奧巴馬總統面對財政懸崖，臨到最後關頭，居然亦來一幕躍馬過懸崖，搞掂民主黨內部，統一議員口徑，跟住分而治之，成功分裂眾議院共和黨議員，令85名共和黨人倒戈，贊成白宮一手策劃嘅多加稅少削開支方案，美國時間一月一日晚上十一點左右大功告成，奧巴馬與副總統拜登見完記者就坐空軍一號飛去夏威夷繼續放假。奧巴馬呢次咁掂，據佢公開講，要好多謝一位出類拔萃嘅副總統談判手腕高超，睇嚟呢位「大口」，競選時成日講錯嘢，連累奧巴馬頻頻補鑊，都係懂得做實事嘅，憑多年議會經驗，可以講掂共和黨參議院領袖麥康萊達成共識，佢平時似乎係「的盧妨主」，但在重要關頭，呢匹的盧就孭起奧巴馬飛越懸崖。
美國看來財政脫險，實則不然，只係奧巴馬緩兵之計，在一月與二月再與共和黨談判「舉債上限」（Debt Ceiling），美國借債上限十六萬四千億美元已到天花板，不能再借債嘅話，難道美國國庫債券違約？共和黨如有勇氣死砌，奧巴馬在二月二十八日前未可安寢，佢點都要諗吓在邊一方面削減公共開支至得，但最大開支就係Medicare，神聖不可侵犯，唔可以碰一碰噃。去年左丁山一位香港朋友背脊痛，要施手術，入本港私家醫院要好貴，入公立醫院不知排隊到幾時，後來醒起自己係美國公民，年紀已大，於是飛返加州搵醫生做手術，手術費由Medicare支付，慳番唔少，佢平時有醫療供款嘅，所有供款一鋪攞返晒。
據紐約時報專欄作家David Brooks引述Urban Institute嘅研究所得，美國人民夫妻兩人平均一生供款十萬零九百美元，而向Medicare取回嘅得益（benefits）共三十三萬四千美元，回報率係3.14倍，去邊度搵呀？付鈔嘅當然係納稅人，如此制度，有邊位政客夠膽碰一碰，就會俾選民用選票趕走，故此平時提也不敢提。香港現在有人講全民退休保障看似有理，實則香港財政無法長期承擔，將來如果成為事實，就會將香港推上懸崖！