「上海姑爺」羅康瑞同「最美麗港姐」朱玲玲兩公婆恩愛得來，得閒仲耍吓花槍，超級羡煞旁人！
朱玲玲：干預創作自由
瑞安建業（983）CEO黃勤道（Philip）早排講起，舊年底搵咗慧妍雅集幾位港姐幫手，影輯靚相做慈善畫冊，畫冊本月出版，部份相攞埋來做瑞安建業2013年年曆。
輯相其實影得好靚，特別係老闆娘，點知上海姑爺見到其中一張，朱玲玲着住黑色low-cut短裙嘅相，即時大興問罪之師，同朱玲玲講：「你話晒都係董事長夫人，點可以出啲咁嘅相，唔出得！」羅太就拋出一句「你唔可以干預創作自由！」來還擊。
Philip喺現場目擊整個過程，當然唔敢出聲，指當時都有啲火藥味㗎。咁就梗係啦，有外人喺度，姑爺點都要惡啲，話唔定轉過頭，當其他人走晒，姑爺即刻呵番老婆大人，唔係大家𠵱家點會睇到呢張靚相呢？