高人一等總是勝人一籌，有時裝業顧問公司於2008年至2009年間收集了四萬名中國人的身材數據，結果發現中港男女在20年間長高了6厘米（2.3吋）。
不少讀者來函分享「長高」的心得，其中出生於1973年的德尊先生（化名），在16歲的時候已經長到6呎2吋高，德尊先生歸功於「吃得多、吃得濫」，並且自認成長時期天天都吃「打針雞」，才能夠長得高人一等，且聽聽這位大胃王有何經歷。記者：吳淑義
「朋友叫我德尊，𠵱家從事地產行業。我爸爸身高5呎10吋，媽媽大約高5呎，對上有六個家姐，家中排第一、三、五、七嘅成員都較高，五家姐有5呎10吋，而我就有6呎2吋，全家最高。至於排二、四、六嘅家姐就正常，大約5呎多啲。
食生冷嘢百毒不侵
我從來唔做運動嘅，生得高除咗遺傳同食得多之外，相信係因為細個時媽媽日日蒸雞，我每日最少食四分一隻。老竇話嗰個年代啲雞係食激素或者打針大，經常食雞等於間接吸收咗生長激素，會幫助人生高啲。呢個係阿爸嘅理論，我都認同㗎。
我認識嘅中國朋友當中，同代人冇人高得過我，原因係我由細到大乜?都食，雞皮、肥膩、高膽固醇，全部都唔理，全部都塞晒入口，可能就係因為咁，唔單只營養夠，仲係全面。
我食自助餐可以講係嚇親人，差唔多食到列入黑名單咁滯，我?食量包括兩碗湯、三打生蠔、四隻龍蝦、一呎魚生、一磅牛扒加六球雪糕，再加好多好多熱食，食飯前後相差四、五磅。有啲人叫我『大食積』，亦都經常有人叫『食物焚化爐』。
濫食有乜嘢後果？細個經常飽到嘔，大少少食生冷嘢好多時肚屙，𠵱家基本上練到百毒不侵，試過同太太食象拔蚌，我有少少絞肚，佢就腸胃炎入咗醫院。
我小學時唔高，到小四先開始坐全班最後，12至15歲時高得特別快，記得中二、中三?時候，有時體育堂彎身執嘢，覺得背脊好痛，後來發現背脊有疤痕，好似大肚婆啲妊娠紋咁，醫生話係因為骨骼生得快，皮膚生得慢，皮膚撕裂而形成嘅。
長得高多女仔鍾意
高嘅煩惱係搭巴士會頂頭，要留意唔好寒背，同埋背脊留有疤痕囉。
但係高?優勢就係啲女仔鍾意，有女仔話男人高就好似女人白，唔需要特別靚都好多人鍾意，我相信㗎。我結咗婚，老婆高1.7米（近5呎6吋），佢曾經講過同我出街好開心，因為可以着4吋高踭鞋都唔使擔心高過我。
我個仔今年4歲，喺班裏面唔算特別高，唔會刻意谷佢食雞，順其自然囉。
我嘅宗旨係食得開心就算，唔會刻意話畀人聽我食得多，亦唔會刻意減肥，但畀咗個界線自己，40歲就要收歛，𠵱家仲有一年可以食囉。」
專家：打針雞無助生高
6呎2吋的德尊先生，認為自己長得高皆因食量驚人，以及天天吃「打針雞」吸收生長激素有關。但威爾斯親王醫院內分秘及糖尿科主管周振中表示，食物中的性荷爾蒙激素，會令人較早性發育，骨塊過於早熟後停止長高，人反會長得較矮；而外來的成長激素，不能通過進食發揮作用，「有啲兒童缺乏生長激素，都要靠注射方法打入身體，生長激素食落肚只會消化咗」。
麥堅時綜合治療中心註冊營養師尹耀林指出，先進地區和國家對食物殘留物有嚴格的監管，供港食物必須符合法例標準，含有的激素對成長影響有限，反而沒有偏食及多吃肉，能夠吸收高蛋白質幫助成長。
他指社會趨勢是一代比一代高，如父親有5呎10吋高，兒子多長4吋也不出奇。
德尊背部有狀似妊娠紋的疤痕，皮膚科專科醫生馮偉傑指那是因為皮膚跟不上肌肉生長速度所致，可以稱為「青春期成長紋」或「萎縮紋」，部份皮膚凹下成條狀，初期會發紅，隨着成長變淺色，不會影響健康。
