梁班子自以為隻手遮天，吳得掂硬推國教、劏房波懶理利益衝突，狼振英更加違法僭建當無事發生，有咗呢班政壇古惑仔，江湖從此多事。經典漫畫《古惑仔》竟然為狼振英度身訂做新角色，名為唐振英、英文名叫CY嘅呢位社團智囊最擅長「講大話」，仲教人用封牆方法遮住僭建地方，好多網民大讚主編牛佬設計呢個角色係為人民發聲。
今個星期一出版嘅1570期《古惑仔》，入面有貌似梁振英、名叫唐振英（CY）嘅新角色，佢係黑社會大佬狄威嘅智囊，一出場就應狄威吩咐，幫手搞一間別墅嘅僭建問題，呢個CY話喎：「有乜甩漏，封咗道牆就可以啦！再講，我以前都係測量師……完成查核我就會出嚟開誠布公咁面對記者」，對白係咪似曾相識呢？
狄威最後叫佢唔好講咁多廢話，CY即刻回應：「我以後一定會多講實話、多做實事。」噚日出版嗰期《古惑仔》，CY又出場，話要穩中求變，再俾狄威鬧佢講廢話。
網民讚牛佬「香港良心」
唔少網民對此拍爛手掌，有人讚牛佬係「香港良心」，亦有人多謝牛佬為小市民發聲；但亦有網民擔心牛佬影射權貴，《古惑仔》可能隨時被迫停刊喎。
《古惑仔》負責人Jacky話，牛佬不時都加插一啲話題人物入《古惑仔》，呢個CY都係過場客串，跟住黑社會大佬出出入入；唔知會唔會俾人投訴㗎，都係想整啲笑位啫。現實版狼振英咁多笑料題材，睇怕漫畫版CY長做長有喎。
mailto:[email protected]
