牛市狂勢欲罷不能，恒指升唔夠百點，但升跌比例Keep住喺64:36高水平，反映熱錢由指數股轉戰個股，成交逼近900億銀，基金搶貨明顯，派對仍可繼續。
澳門博彩收入去年全年及單月均創新高，證明內地豪客已歸位，照計目標客戶一樣嘅珠寶鐘錶股唔差得去邊。東方表行（398）現價市盈率16倍，比歷史高峯23倍PE，有三成折讓，隨着市道回暖，估值理應可提高。
集團現價PB僅0.81倍，英皇鐘錶（887）、六福（590）及周生生（116）平均PB達2.3倍，東方表行比同業平逾六成，計估值最抵買。與2011年底收市價比較，東方表行累計仍跌17%，上述3股升幅介乎1.1%至20.3%，資金炒落後，東方表行又多一個賣點。政府噚日公佈11月銷貨值升9.5%，遠勝市場預期，零售股今日肯定成為市場焦點，東方表行噚日收報2.97元，升5%，蓄勢破關。現價上車，以1倍PB作目標，可見3.67元，潛在升幅24%。
唐牛