今年第一擊成績不俗，昨推介陽光紙業（2002）母憑子貴，子公司去年首3季勁賺逾7000萬人仔，刺激股價單日爆升13.5%，可見前日大成交急升，屬春江鴨先行掃上。睇圖揀股，成交相當重要，是虛火抑或堅料，一目瞭然。
呢兩日魚缸百花齊放，但爆升股仍有迹可尋。特徵一，在低位徘徊逾3個月以上的低殘股，如陽光紙業，配合大成交就一棍爆上。第二，就係仍在250日線以下的股份，當抽穿250日線就可追入，華耐（1020）就是一例，昨升破0.48元後頭也不回，埋單飆20%，收0.56元，即日食糊都得。
今日介紹隻具同樣特徵，估值平、復蘇概念十足的興業銅業（505）。集團主攻高精度銅板帶，產品用途廣泛，電子器材、電訊設備、汽車零部件及輸電系統都要用銅板帶，無論係汽車、三網融合及節能環保等國策，興銅通通受惠。
業績方面，受產品跌價及新產品未及時帶來貢獻影響，去年中期純利僅2023萬人仔，按年倒退77%，但已比2011年下半年反彈9倍，可見業績已見底回升，加上近月國際銅價已由低位反彈一成，興銅絕對有力追落後，昨大成交突破9月以來橫行區，升穿250日線，收報1.08元，短線先試1年高位1.45元。
魏力
http://www.facebook.com/2012jason