大迷信！2013年伊始，娛樂圈擔心有巨星殞落，財經界亦有一件奇事，前日係港股今年首個交易日，恒指勁升655點，事有湊巧，09年首個交易日，恒指同樣升655點，當年港股受惠於美國QE1，年初終極一插後，全年牛到不得了，恒指埋單升咗52%，港股今年會唔會一樣咁牛呢？
麥玲玲：蛇年炒股要快
港股今年開頭開得咁好，噚日繼續喺大成交下回少少再升，唱好後市嘅聲音此起彼落，就連麥玲玲師傅都話嚟緊股市好炒。佢指，龍年冇財星，蛇年就有嘞，所以股市好炒；蛇有蛇嘅特質，行動迅速，換言之，今年炒股都要好似蛇咁：快、恨、準，亦要慎防股市走勢似玩過山車，波幅大，上落好刺激。
玩基本分析，名嘴鄧聲興亦睇好今年股市，指美國推QE4、內地經濟政策稍為放鬆、企業生意好轉等利好因素推動下，恒指有機會升上26000至27000點，即係最多有15%升幅，內房、基建、資源股有得炒。
3字尾 有兩個股災年
不過大家唔好亢奮住，市場見好唱好係常態，睇番歷史，87、97年係股災年，73同03年都係股災年喎，當中又冇乜規律可言，2013年係大牛市還是股災年呢？祝君好運了。
李華華
mailto:[email protected]
