「人生中有歡喜，難免亦常有淚」，由一代詞人黃霑填詞嘅《獅子山下》係港人集體回憶。衞奕信勳爵文物信託成立20周年，搞咗個巡迴展覽，首度展出三首由霑叔填詞嘅珍貴手稿，包括膾炙人口嘅《獅子山下》。
原來《獅子山下》嘅歌詞「同舟人誓相隨，無畏更無懼」，初稿係「同耕耘共找尋，人世樂園安居」。負責整理霑叔手稿嘅港大社會學系副教授吳俊雄博士話，《獅子山下》成個創作時間用咗八日，霑叔首《上海灘》只係用咗25分鐘，呢首歌算創作得耐。展覽今日起在九龍公園文物探知館舉辦，免費入場。
