晉佳舊年最後一個交易日講過，今個月頭基金經理放假番嚟，配合財政懸崖問題解決，有機會出現一輪短線基金補貨潮，當佢哋完成接貨，消耗購買力之後，港股就可能短線見頂。睇番前日美國財崖傾掂，港股爆升655點，似乎跟足晉佳劇本走。
經過雞犬皆升之後，大市接近見頂，下一步就係等幾時出現派貨訊號。不過，噚日恒指以全日高位收市，二三線股相當好炒，未見派貨訊號，投資者大可炒得一日得一日，事實上二三線爆升幾多估佢唔到，例如上期晉佳寫雅士利（1230），兩日就爆上15%，所以家陣最好一邊放紙鳶，一邊觀察個市有冇派發迹象，一有異樣就要減持。
水泥股中，亞洲水泥（743）上個月一早爆上，龍尾股台泥（1136）都連升兩日，山水水泥（691）仲係喺頭肩底頸線樓下潛伏緊，係時候破位追落後嘞啩。
中長線博見8元
晉佳上個月先後推介過海螺（914）同台泥，今次山水水泥故事都係差唔多──城鎮化、行業新增供應見頂、淘汰落後產能、內地經濟回穩等賣點。
舊年上半年，山東省收入佔山水水泥總收入七成。據美林11月份報告，山東省今年有4條水泥生產線投產，預計新增產能會被落後產能淘汰抵銷，即係全省今年水泥供應冇乜增加。至於山水水泥今年產能會增加一成，換言之，喺山東省嘅市佔率會上升，配合內地經濟回穩，山東省預計會係受惠城鎮化省份之一，水泥價格有機會見底回升，刺激山水水泥今年價量齊升。
以全城最淡嘅大和盈測去計算估值，都估山水水泥今年每股盈利升10.8%至52.2分，仲未計城鎮化因素喎。一隻盈利見底、市盈率10倍嘅股份，估值點都算平，況且圖表亦靚仔，4月至今形成頭肩底形態，頸線約6元，股價力守保歷加通道中軸半個月，動力十足。個市升到㷫烚烚，𠵱家唔突破等幾時，短線博升一成唔難，按頭肩底量度升幅，中長線博上番8元。
晉佳
本欄逢周一、三及五刊出