【專訪】
珠寶龍頭股周大福（1929），上市以來股價「潛足一年」，近日終在銷售回穩、大行唱好之下重新發力，創上市新高，力爭浮出水面。對於市場憧憬「最壞情況已過」，周大福董事總經理黃紹基接受專訪時透露，12月份銷售能延續早前的回穩走勢，但對於短期看法仍保守：「今年上半年做到『平穩』已經是福喇！我估到下半年先有比較理想的增長步伐。」
「以前食魚翅 𠵱家食粉絲」
黃紹基透露，11月至12月中銷售的確已回復增長，氣氛明顯轉好，甚至高消費豪客都有小部份「回歸」迹象，但他形容情況只能算是「平穩」，唔敢講最壞情況已過去：「我哋12至2月的比較基數仲係好高，做到平穩增長已經好好㗎喇！」
周大福目標三年營業額「翻一番」，相等於每年的銷售要平均增長26%；但集團剛公佈半年業績，收入只升6.5%，盈利倒退，仍偏離預期。雖然周大福近日股價爆升，但以昨日收市價13.22元計算，要重返招股價15元的話，仲有13%距離「要跑」。
黃紹基坦言，這個三年計劃是一個「很進取、有野心」的目標，不輕易達到：「頭半年開局的確唔係幾好，不過我哋唔會咁快放棄。總之外圍經濟係點，我哋控制唔到，但可以調整盤貨、諗橋去適應市場。以前係食魚翅（比喻高消費豪客），𠵱家就食粉絲，但都一樣做到生意！」
周大福現時分店數目有近1700間，每年至少淨增加200間，即單靠新店提供的增長，僅約12%左右。如要達到集團的三年目標，同店增長至少要重返10%以上先有機會。截至去年9月底止上半年，周大福整體同店銷售，按年仍跌1.7%。
對於提升每間分店的效益，黃紹基認為尚有很多工夫可做。如內地分店的產品組合種類不夠，經營面積偏細，導致盈利能力不及香港：「內地有87%的銷售點都在百貨公司，通常面積得香港一半左右，未來幾年我哋會全面upgrade，增加新產品。我哋亦準備就緒，如果金價今年又開始大漲，只要金市一返嚟，我哋係10至14日之內，就已經可以推晒應市啲金器出街！」
過去幾年賣黃金珠寶太容易賺錢，黃紹基料內地市場未來將有整固。「以前金市長升長有，入行門檻低，個個拎盤金出嚟賣都賺到錢，賣唔出齋坐貨都有賺呀！但𠵱家生意無咁好做，要本身有競爭力先得。」