【灣仔峽公園】張栢芝呢輪冇戲拍，噚日下晝4點幾，佢變身做廿四孝媽咪陪兩個寶貝仔Lucas同Quintus享受天倫樂。佢哋去咗灣仔峽公園踩單車，同行仲有一個傭人侍候，只得2歲嘅Quintus雖然識行識走，但係就唔係好識踩單車，栢芝坐埋喺單車尾，好似鴨仔咁用腳推車，𠱁到Quintus咭咭笑。
輪住錫嘴仔
至於5歲嘅Lucas就越大越精靈，樣子似足老竇謝霆鋒，佢踩單車玩到好純熟，不停喺後面追住媽咪同細佬，玩到好開心，而戴住賊仔帽着大褸嘅栢芝，為免兩個寶貝仔冷病，不時細心幫佢哋戴好冷帽，又餵兩兄弟飲水解渴，仲輪住錫Lucas同Quintus嘴仔，真係母愛爆棚。
其間栢芝仲吩咐傭人幫佢三母子喪影合照，Lucas擺出唔同表情姿勢，可愛到暈，佢哋走嗰陣啱啱有人放狗，栢芝教Quintus同狗狗say hi，佢又親自抬單車上保母車，果然係好媽媽。
採訪、攝影：馬華、徐錦池、朱志聰