好不主席:老臨有價 - 盧先亞

好不主席:老臨有價 - 盧先亞

「你條死茄喱啡吖真係。」「嗱嗱嗱嗱,其實我係一個演員嚟嘅。」呢啲經典對白相信好多人都仍會記得係出自星爺嘅《喜劇之王》,每次睇電視重播齣戲,都叫人記起曾幾何時我都係一個茄喱啡,但點都唔會自命係個演員囉。

嗰陣在學,可以掙錢的事情都不肯放過,「勤工儉學」四字受之無愧。而茄喱啡,尊稱應該係「臨時演員」、「臨記」或「老臨」,不過就是外快途徑之一。而印象最深一次的經驗,就係喺番港大嘅「陸佑堂」,場景是舞會,所以要有一眾老臨扮群舞。演員只有雙林,那就是永遠的美人,林青霞和我一直的偶像──林子祥!
未接通告前,不過就係搭上搭嘅電話打嚟問「開唔開工?」,根本唔知拍乜,不過一聽近在咫尺,當然二話不說。若然早知道係許大導演作品,仲可以一親偶像,莫講話唔收出場費,倒貼番300蚊都心甘命抵。呢個真金白銀係廿幾年前嘅工錢,即係嗰陣我身為一個茄喱啡都已經收緊三舊水!所以家陣睇到「有償遊行」仿似完全抗衡通脹嘅仲係300蚊,又話要減到280蚊,最後竟然250蚊就成交。我覺得將呢啲「收錢示威」嘅人士,視為「臨記」,先係對呢個行業最大嘅侮辱。

派錢遊行 慈善團體受惠

難怪有位又似元秋上錯身嘅C9(師奶),喺愛港之聲在政府總部舉行嘅嘉年華集會上,上台公開表白,回應挺梁有錢收之說,堅稱自己:「我真係好嬲呀,平時唔會出嚟!200蚊係絕對請唔起我!」先不論點解又再少咗50蚊,係咪又有中間人落格,但起碼佢都真係話到畀全港嘅市民知,茄喱啡係唔止呢個價嘅,而佢今次挺身而出,實屬友情客串,打埋人情牌,又豈可以普通銀碼量度。俯心傾聽,相信那些新界社團定能回應市場訴求,下次動員晒馬,自會償付合理報酬。
其實,最終受惠的還有不少慈善團體,因為有多間傳媒的記者,成功獲招攬,僭伏隊伍當中,同樣「開工」遊行舉牌。事後並能清楚拍攝其中收款過程和相關人物。當然,他們本有其職業「樽鹽」,豈能賺此不義之財,所以悉數盡捐。建制技窮,下回亦只會繼續「被抹黑」、「被插贓」,而「反港亂中」人士如我輩,亦只有對着幹「無償上街」。又想起我套茄喱啡力作,尾段有這麼一句:「有些事明知沒結果,但有意義的話,也要堅持下去!」

盧先亞