法國社會黨總統奧朗德上台後，向「超級富有家庭」徵重稅，稅率高達75%，於是一啲超級富戶紛紛離開法國，去倫敦、去比利時，甚至放棄法國籍，LVMH大股東因此首先受到批判，佢係大資本家，被罵不大敢還嘴，但一位大鼻子影帝狄百度忍無可忍，索性鬧番轉頭，話自己係歐洲人，唔再係法國人，搬咗去離法國邊境不遠嘅一條比利時鄉村，呢條村住咗不少法國人，過境回返法國只需十幾分鐘，法國稅局莫奈之何。俄羅斯總統普京仲嚟抽抽水，話可以送本俄羅斯護照俾狄百度（Depardieu），分明有意剃奧朗德眼眉；比利時外交部長居然亦唔客氣，呢位Reynders先生對巴黎「費加羅報」謂：「法國唔可以怪責其他人，早應知道後果自負。」更表示歡迎任何一位法國人跟隨狄百度落戶比利時，當然係指有錢人啦，窮人梗係留在法國攞福利。
最近法國最高法院裁定向超級富戶徵重稅75%係違反憲法，打咗奧朗德一巴掌，但判詞留有空間俾奧朗德政府修改立法細節，再度提交最高法院裁決。原來向超級富戶（年入一百萬歐元以上）徵重稅，在執行上有實際困難，奧朗德政府建議，如一家四口，夫妻兩人各年入六十萬歐元，不納入超高稅網，但如果係丈夫一人做事，個人年入一百二十萬歐元，咁就要交75%稅，法庭就係覺得咁樣唔公道，裁定新稅違憲。如果奧朗德修改細則，一個家庭無論幾多人做事，家庭收入超過一百萬歐元就要徵收75%稅，後果會如何？相信會將家庭打散，引發「假離婚」，產生社會問題，總之有排煩，咁鬼煩，其實一年只係多收一億至三億歐元稅款（因超級富戶甚少），都未必夠俾巴黎聖日耳門球會收購美斯。奧朗德只係追求一個象徵意義，向國民顯示自己願意與大富豪「碰一碰」，劫富濟貧而已。奧朗德實情就係做一場戲，懷社會主義傾向之空幻理想政客，係幾得人驚嘅。2012年，法國失業率高達10.7%，創15年新高，有三百一十萬人失業，咁嘅情況下，仲要向可以創造職位嘅富戶（例如狄百度）徵重稅，趕佢地走，就是社會主義色彩嘅公共政策，法國經濟想話追上德國，幾難咯。