上年風雲人物，肯定非學民思潮莫屬，佢哋帶領全港成功反洗腦，前政務司司長陳方安生都相當欣賞呢班學生，噚日同記者茶敍時，仲點名讚賞召集人黃之鋒，話佢係明日政治領袖，講嘢有紋有路，15歲已經相當淡定，覺得時下年輕人相當關心時事，越嚟越敢言，令政府唔敢亂嚟。陳太仲寄語，各個泛民政黨要栽培新血，唔知係咪暗寸有啲政黨仲玩緊老人政治？
陳太呢次茶敍，原本約喺上個月聖誕前，點知感冒菌橫行，陳太中咗招，病足三個星期，等到元旦過後先同記者見面。而學民思潮公佈元旦遊行籌到25萬，其中千幾蚊係「人仔」，證明有強國人力撐。