發展商計劃喺美孚新邨起屏風樓，後來入稟禁制示威者闖入地盤，做咗單案第八被告嘅「阿牛」曾健成決定上訴。上訴庭噚日下令，阿牛要喺2月14日情人節前，將45萬蚊訟費保證金存入法庭；若果第日阿牛上訴失敗，筆保證金就會用嚟支付發展商嘅訟費。
阿牛喺庭外，仲有心情同專程嚟撐場嘅長毛搞爛gag，佢哋話適逢噚日係1月3日，單案就喺4樓5庭審，一陣間要去買六合彩投注號碼1、3、4、5，希望贏5,000萬金多寶，咁就實夠畀保證金喎。
佢兩個做唔做到千萬富豪就未知，而上訴聆訊就排咗期喺2月26日審，當然，佢要籌到45萬蚊先有得審啦。