已故「愛國商人」霍英東唔只家族成員繁衍，霍氏家族在港物業亦多到數唔清，沙宣道大宅莊園固然夠氣派，家族早喺七、八十年代買入唔少豪宅，今日亦身價飛升。
好似淺水灣麗景園，屬區內數一數二大型分層豪宅，政府土地註冊處資料顯示，霍英東三房兩位公子霍顯光（Danny）同埋霍顯強（Michael），舊年9月同10月用私人名登記，承接咗3座同10座中層兩個單位，造價分別係1500萬元同1260萬元，前者同市價約5600萬比一比，大約係二七折！
點價咁筍？原來兩個單位係霍氏家族物業，10座中層個2288呎單位，霍家1975年以26.4萬買落，3座個2800呎單位，就喺1985年以168萬買入，家陣呢個單位至少值5600萬。兩件貨值成億，分又好，平賣又好，睇來都係益番自己人。