梁政珏對迷你約瑟爹利情有獨鍾，雖然有過兩次不快經歷，養過的兩隻同品種狗女相繼不幸離世，但她仍堅持繼續養，還因養識發老脾的高竇狗令她變得更有耐性，認真鑽研這類狗的特性，希望能與愛犬Annabella擁有更長的相處時間和更多美好回憶。
撰文：胡比
梁政珏（Jeanette）從小就很喜歡小動物，但父母一直不讓她養寵物，因為他們曾經在兒時有過不快的經歷，知道一旦失去心愛寵物，心靈會受到一定傷害，久久難以忘懷，正因愛女心切，為保護她的弱小心靈，才堅決反對，直到梁政珏到美國讀書。
與貓無緣
梁政珏不是有心反叛，只因獨自在外國，又怕寂寞，於是想到領養動物，一嚐養寵物的滋味，也可有個伴陪伴自己，她說：「本來諗住去領養隻貓，喺美國領養動物，首先要每星期去探吓隻動物，同佢培養吓感情先，然後雙方都有一定熟悉程度，先可以辦領養手續。原本已經準備好要領養嘅貓，點知最後一次去嘅時候，我竟然敏感症發作，嗰時先知自已原來對貓毛敏感。」最後貓咪沒被領養，卻令梁政珏領會到要養寵物，除了講緣份，還要擁有一定的知識。
看似嬌生慣養的梁政珏，性格帶點儍大姐，但認真起來卻令人刮目相看，她花了四年時間，買了各種養狗的書籍，增加這方面知識，然後她決定要養迷你約瑟爹利，於是又再鑽研這類狗的特性，誓要做一個負責任的狗主，她更對這種小狗情有獨鍾，前後養了三隻迷你約瑟爹利，拍照當天帶來九歲狗女Annabella。
之前兩隻都是狗女，但已不幸離世，梁政珏憶述：「一隻病死咗，一隻意外死，終於明白點解爹哋媽咪唔畀我養動物，佢哋離開時我真係好傷心，要平復好耐先可以再養，但令我更明白要對寵物有更多愛心，因為佢哋嘅世界只有你，但人就可以有屋企人、朋友同愛人，養動物都令到我個人成熟好多，好開心可以同佢哋有好多唔同嘅經歷，為咗教好佢哋，自己嘅耐性同EQ都高咗好多。」
提起愛犬Annabella，梁政珏便滔滔不絕，她說：「Annabella雖然係狗，但性格似貓，好有性格，愛捐窿捐罅，有時仲會鬧脾氣，好高竇，試過我出街冇帶埋Annabella去，返屋企，Annabella發脾氣對我不瞅不睬，背向住我，要好似𠱁小朋友咁，佢先順番條氣，真係好似湊女咁，有時對佢真係又愛又恨。」
耐心教狗
梁政珏形容自己絕對是理智的狗主，會好耐心教導愛犬：「雖然Annabella未必好似其他狗識做好多唔同動作，但最基本應該喺邊度去廁所，有啲乜嘢佢係唔可以做，一啲都冇問題，只要由細同佢哋傾多啲偈，耐心教佢，唔好以為動物唔識聽人講嘢，其實佢哋真係會明。」
幫寵物買保險
養狗後的梁政珏多了一份使命感，對於不少人以動物作宣傳工具，她極為反對：「啲人就係成日睇到廣告，覺得啲動物好得意，冇諗清楚就買返去養，但之後又唔負責任，呢個行為真係好差，所以我好希望呼籲啲人養動物之前，真係要諗清楚，就算想養，最好去領養，冇咁多人買狗，就唔會有人不停咁繁殖，啲動物就唔使變咗生仔機器。」
梁政珏還提議一眾養寵物的人要為動物買保險，她說：「唔好以為買動物保險好貴，其實一啲都唔貴，仲可以保障到動物嘅生命可以長久啲，因為好多時啲人就係因為帶寵物睇醫生嫌貴，令動物有病遲咗去醫，咁樣對啲動物唔好，寵物病咗主人都會唔開心。」
