友邦保險資深區域總監王傲山（Marcus）出名識飲識食，佢仲識揀靚老婆，下周一（7號）就同拍拖一年嘅有線主播劉明軒（Vivian）拉埋天窗，下晝喺教堂行禮，晚上喺ICC Ritz Carlton筵開50席大宴親朋。
Marcus除咗喺保險界吃得開，原來喺財經界亦有唔少朋友，名嘴陳永陸、鄧聲興、黃德几都係佢朋友，到時亦會出席婚宴。佢哋唔係Marcus嘅保險客戶，主要係陸叔不時幫友邦主持投資講座，Marcus同陸叔大大話話識咗十幾年，之後再一個介紹一個就識咗幾位名嘴。
準新郎話，雖然佢未跳過舞，但就專登搵咗位跳舞老師教佢同Vivian跳舞，打算到時表演番part舞。婚禮過後休息幾日，佢哋就會飛去北歐、法國旅行度蜜月，月尾先回港，下月農曆新年就可以大派利是嘞。