轉會市場重開，又係各支球隊增兵同清除瘀血嘅時候。紅軍利物浦近年喺收購球員上一向不惜工本，啱啱就由車路士簽咗前鋒史杜列治返嚟；另一邊廂要送走唔啱使嘅球員一樣咁果斷，甚至倒貼400萬鎊（約5,000萬港元）人工畀中場祖高爾，都要促成佢返母會韋斯咸，蝕一大筆但求早啲分手。
祖高爾喺2010年夏天由車路士加盟利物浦，雖然免轉會費，但周薪成9萬鎊，條件相當優厚。點知平嘢冇好，祖高爾第一季喺利記完全格格不入；上季被借去法甲里爾，到今季返嚟之後又變番二打六，領隊羅渣士決定喺1月轉會市場清洗佢。
31歲嘅祖高爾同利記原本仲有18個月約，球會為咗送走佢，決定一次過畀400萬鎊買斷合約，等韋斯咸可以用冇咁高薪嘅條件簽到佢。雖然表面睇利記好似搵自己笨，但如果祖高爾繼續白𢭃人工多一年半，要畀嘅就唔止400萬鎊，算係除笨有精送走瘟神㗎喇。祖高爾就已經去咗韋斯咸嗰邊進行體測，仲成功通過，簽咗份韋斯咸畀周薪3萬鎊嘅兩年半合約。
紐尼沙軒時日無多
利物浦買人一向夠晒豪，而且一唔啱使就盡快清貨，蝕幾多都唔手軟。近年最經典嘅例子要數前鋒羅比堅尼，08年以2,000萬鎊由熱刺收購，點知半季之後就6折賣返畀熱刺。
同樣2,000萬鎊身價嘅意大利中場阿古蘭尼，09年加盟之後一路都冇表現，3年嚟外借過畀祖雲達斯同AC米蘭；到今季季前被賣到費倫天拿，收返幾多轉會費就冇官方公佈，但睇怕都係蝕入肉。之後仲有保臣同查理阿當等，𠵱家借咗去韋斯咸嘅3,500萬鎊前鋒安祖卡路爾有可能成為另一個賤賣對象。
祖高爾之後，下一個離開紅軍嘅球員可能係中場借將紐尼沙軒，羅渣士唔打算續用呢位土耳其球員，繼國際米蘭之後，據講沙軒嘅前屬球會多蒙特都對佢有興趣。