美國財政懸崖終於傾掂數，帶挈港股紅盤升逾600點，可喜可賀，唔少價殘藍籌如港交所（388）及中信泰富（267）都大爆發，與本欄所講資金搵落後股炒不謀而合；噚日推介嘅震雄（057）進賬3%，勉強跑贏大市，有跟進嘅戰友可坐定定等食糊。
今日繼續向落後股埋手，體育用品股361度（1361）舊年插水28%，跑輸大市成條街，炒大翻身肯定有佢份。集團截至6月底止半年賺6億人仔，按年倒退23%，但由於股價殘到暈，年度化市盈率僅3.3倍，手頭淨現金24.9億港紙，佔市值逾一半，名副其實係現金牛；派息都不失禮，齋計中期息已逾3厘，年度化計更達7.3厘，早排獲納入恒生高息股指數，質素有保證。
361度噚日收報2.34元，升5.4%，呈圓底走勢之餘，更成功突破250日線，由熊轉牛迹象明顯，現價吸納，突破2.50元再加一注，以3元作目標，潛在升幅28%，屆時仲較去年高位低16%。
唐牛