自由黨自從田北俊回歸立法會之後，一直勇字當頭，不時出言諷刺呃咗個特首寶座嘅狼振英；黨主席周梁淑怡噚日喺蘭桂芳同一班年輕黨員聚首，教佢哋喺狼英治下生存之道。查實自由黨喺民生議題一樣大膽，今日就開記者會，促請政府改革綜援制度，棒打濫用綜援嘅大懶蟲。佢哋話會提供堅實數據，證明攞失業綜援嘅、嚟嚟去去都係嗰班人。呢個議題向來惹火，早前自由黨拋出呢個建議，就即時俾社區組織協會抦到七彩；社協𠵱家仲被視為梁營、死撐狼英，睇嚟對唐營呢個建議，肯定加多幾錢肉緊追打。