梁粉搞遊行，要出錢請臨記撐場挺梁；點同泛民支持者，唔單止唔使錢都肯出嚟行，仲主動捐錢畀政黨，支持繼續倒梁。原來喺四大主流泛民政黨中，社民連吸金力最強，其次係公民黨、民主黨同工黨。長毛魅力，認真沒法擋。
工黨創黨僅一年籌10萬
成日呻窮嘅社民連，元旦遊行乜都冇賣，單靠三個街站已經籌到25萬，成為吸金能力最強政黨。咁多人支持，身為主席嘅長毛，公民抗命而俾人拉，又如何？大家咪以為，社民連籌到咁多錢就發達咯，事關佢哋上至主席長毛、下至副主席吳文遠，個個都有唔少官司喺身，隨時籌得快、使得快。
排第二嘅公民黨亦唔差，籌到18.4萬，佢哋出售未散晒貨嘅狼tee，以及前黨魁余若薇墨寶嘅文件夾，兩樣嘢夾埋籌到3萬，剩番15萬幾就係市民現兜兜磅水。民主黨籌到逾13萬，據講好多人都用捐獻撐新任主席劉慧卿，認真唔話得。只得1歲大嘅工黨，主席李卓人當日嗌咪嗌到聲沙，換嚟10.3萬支持，算係幾好嘞。如果計埋民間團體，吸金王可能係學民思潮，但佢哋噚日仲未點完數。民間電台都唔錯，籌到11萬，台長阿牛相當高興，磨拳擦掌準備喺元朗開多個發射站。
mailto:[email protected]