新一年去「富豪飯堂」福臨門食飯可能會感覺平靜啲，事關福臨門兩兄弟嘅股權風波終告平息，七哥徐維均今日喺多份報章刊登「離職通知」，話已經離開打理50年嘅香港福臨門，並將離開九龍福臨門，日後繼續喺其他佢經營嘅酒家提供服務。
登報說再見 難捨難離
一提到有65年歷史嘅福臨門，大家必然諗起差唔多日日幫襯嘅華置（127）主席劉鑾雄，仲有東亞銀行（023）主席李國寶、許晉亨同太太李嘉欣都係熟客。創辦人徐福全係何東家廚，1968年將福臨門交畀兩個仔徐沛鈞（五哥）同徐維均打理，分別負責管數同廚房出品。
可惜呢門家族生意逃唔過爭產爭權呢個情節，五哥同七哥自08年開始傳出不和，之後鬧上法庭，舊年年底先庭外和解，七哥今日登報表示已經離開福臨門香港，並將離開九龍店，算係為成件事劃上句號。讀七哥份離職通知，睇得出佢唔捨得，劈頭就講自己14歲就跟阿爸喺福臨門學廚，將會堅持阿爸傳授嘅廚藝精神，日後繼續喺其他酒家提供服務。
之前大家只係估到七哥離開，唔知佢有乜動向，睇份離職通知，七哥以福臨門酒家（中國）有限公司同福臨門酒家株式會社做下款，照咁睇，佢似乎繼續經營福臨門內地同日本業務喎，唔知班富豪熟客會唔會得閒飛去食番餐呢？
李華華
mailto:[email protected]