嚿年立法會拍住單仲偕出戰港島區嘅民主黨80後中西區議員許智峯（圖），參選前兩個月喺元朗違例泊車食牛肉乾，原本罰320蚊就冇事，但讀法律出身嘅佢唔服氣，搞到上法庭。
冇請律師嘅許智峯噚日同法官講，事發嘅寶樹里係條倔頭路，冇單黃或者雙黃線，又冇路牌寫明唔可以泊車；嗰度好少車，冇可能造成阻礙，但交通督導員話睇住佢架車阻住啲車出入。裁判官最終判佢罪成，除咗原本嗰320蚊，仲要額外交罰款320蚊同堂費800蚊，即係罰成1,440蚊。許智峯事後話嗰日人有三急，只係泊低架車去廁所；雖然打唔甩官司，但可以為自己抗辯，都係行使公民權利喎。