人貴自知，唔關自己事就咪出嚟邀功。好似史篤城前鋒奧雲咁，見球隊近來成績好就走出嚟抽水，搞到俾網民狂插話佢唔知醜。點知佢又小器唔話得，仲即搬啲獎盃出嚟以證明自己係幾咁勁，寸番鬧佢嘅網民。新年流流無情白事同網民隔空罵戰，你話佢係咪冇事搵事做呀！
史篤城前晚喺英超以0:3敗走曼城後，聯賽10場不敗走勢亦宣告斷纜。身為佢哋一分子但冇份上陣嘅奧雲，賽後就喺Twitter發表偉論，直頭講到自己作出好大貢獻咁；佢咁話：「今日場波真係好難打，唔係太多球隊可以喺曼城嘅主場攞到好成績。我哋喺英超嘅10場不敗走勢亦完咗嘞！」佢抽完水之後，隨即大把人回應，但幾乎全部都係插佢嘅，有啲仲要爆晒粗，話佢喺嗰10場波都冇份踢，咪講到自己好有功勞。
「等我勾起大家回憶」
其中叫Ben Caddy嘅網民向奧雲破口大罵：「『我哋』嘅10場不敗走勢？你乜X嘢都冇做過，淨係坐喺電視機面前睇咋。」而網民Chris Rushworth就話：「點解你唔落場比賽呀？乜今日你喺後備席咩？」至於網民Simon Ashtony就話：「佢喺佢嘅年代，佢真係英格蘭最偉大嘅前鋒囉！」
奧雲見自己俾人鬧，梗係即時還拖啦，佢咁回應：「我收到大約100個回應，幾乎每個回應都係鬧我，但Twitter就係咁㗎嘞！」之後佢貼咗張獎盃櫃嘅相，入面有歐洲足球先生獎座、英超獎牌、英足盃獎牌及英聯盃獎牌，擺明向鬧佢嘅網民示威。佢仲好囂咁話：「等我勾番起大家嘅回憶先！」我求大俠雖然認為相嗌唔好口，但又明點解史篤城球迷咁討厭佢。
25萬周薪僅踢53分鐘
現年33歲嘅奧雲，舊年夏天由曼聯免費轉投史篤城，簽約一年，周薪2萬鎊（約25萬港元）另加出場費；但佢今季又成日受傷，開「咧」至今只係踢咗4場英超，落場時間得嗰53分鐘，好話唔好聽真係白𢭃人工咁滯，你話史篤城球迷唔憎佢就假。家陣佢仲要唔嗅米氣，冇啦啦學人邀功，搞到俾人插，真係攞嚟賤。