踏入2013年，香港電影九大屬會陸續加人工，由1月1日開始，首先係燈光同機工會調整人工，加幅達百分之五十，由每日酬金840蚊加至1,250蚊，講真香港電影工業已經低迷咗咁耐，據聞此舉𠵱家搞到唔少電影公司老闆反感。
蕭定一公司投資嘅《冰封俠》、英皇同寰亞合資嘅《特種救援英雄》、陳木勝嘅《掃毒》都決定暫時停工，不肯就範。
至於安樂投資、袁錦麟執導、劉德華主演嘅《風暴》因申請封街拍攝，噚日唔開唔得，焗住要接受新價，當係畀一日散工錢，之後就會企硬停工。噚日林家棟同呂良偉喺中環開工拍呢部戲，錢嘉樂做武指，劉德華噚日就冇開工。
《風暴》封街焗開工
作為香港電影商協會主席嘅林建岳噚日話：「我明白大家生活困難，但老闆投資電影一樣好艱難，不如雙方搵一個互相可接受嘅方法解決件事，我會盡快同勞方溝通吓。」
最支持喺香港拍戲嘅杜琪峯，噚日反應都幾大話：「加價唔係唔得，但加幅都要合理，一加就話一半，確實係一個唔健康同鹵莽嘅決定，係咪真係要搞死個電影工業。」
寰宇老闆林小明噚日都話加幅好難接受，佢講：「陳木勝部戲會喺香港開拍，但如果同燈光、機工傾唔掂數，我寧願唔開住，然後考慮改喺外埠拍。」
撰文：馮仁昭
