facebook真係一個越來越好用嘅宣傳平台，老遠來港上市嘅俄鋁（486）為慶祝上市三周年，噚日起至本月27號喺fb搞問答遊戲，只要like俄鋁fb專頁，答中晒或者答得最多問題就有機會獲獎。
獎品iPad mini
獎品方面，都算好有心思，包括iPad mini同Nespresso咖啡機，皆因兩者都有鋁嘅成份。
由於鋁係化學元素周期表第13個元素，所以遊戲設有13條問題，全部同鋁有關或者屬於應用問題，有啲仲係冷到唔冷嘅冷知識，舉例，製造鋁錠最常用嘅原材料係乜？老實講，華華文科出身，只係識答兩條咁大把，雖然俄鋁教埋你喺邊度搵答案，但時間同興趣關係，華華參與過便算了，祝君好運。
李華華